Ólympískar hetjudáðir og fleira gott...

Halló heimur!

Það eru ólympíuleikar í Kína ef einhver skyldi ekki hafa tekið eftir því.  Ég ætla ekki að agnúast útí að ekki er hægt að horfa sjónvarpið fyrir þessum ófögnuði, það er hvort eð er lítið sem ekkert að sjá þar.  Þá er nú miklu betra að hella úr skálum reiði sinnar og hneykslunar.

Handboltalandsliðið hefur gert það gott til þessa og er búið að bóka gullið eins og um árið.  Við skulum rétt vona að það fari ekki heim með skottið milli lappanna líka eins og um árið.  Hvaðahvaða, neinei, áfram strákar!

Sundmenn nokkrir fóru og gátu lítið sem ekkert.  Þetta er nú svona og svona menn eru misvel upplagðir og aðrir "nennissiggi", en það er nú einfaldlega þannig að sumar ferðir eru ekki til fjár, hvað þá frama.  Áfram stelpur og strákar, með hörkunni hefst það, aðrir olluleikar eftir fjögur ár.

Ekki er nú hægt annað en að minnast á frægðarför mikla badmintondrottningar vorrar þjóðar, sem allir voru búnir að bóka bæði bronsið, silfrið OG gullið, pottþétt mál.  Hún, stelpugreyið, entist ekki einn leik, hnéð gaf sig.  Maður fylltist samúð, hún varð að hætta vegna meiðsla, fúlt.  En hvað svo?  Í ljós kemur að allir (allavega hún sjálf og sennilega fleiri) að það var kraftaverk að hún skyldi endast þann tíma sem þó hún entist í leiknum.  Þetta var nefnilega fyrirfram vonlaust, hún hefði nefnilega átt að leita sér lækninga fyrir amk. hálfu ári.  Þetta er nú fínt afspurnar, skattgreiðendur í þessu landi mega láta bjóða sér að kosta olluleikaför stelpu sem fyrirfram var vitað að gæti ekkert.  Mér finnst þetta hneyksli, ég hefði sagt henni að fara í aðgerð og mæta tvíefld að fjórum árum liðnum, en ég er náttúrulega ekki íþróttaspekúlant, en samt "KOMMON!?".

Vega- og umferðarmál hafa ætíð verið mér hjartfólgin.  Nú rífast menn í Ölfusi, samgönguráðuneytinu og Vegagerðinni um það hver sé vondi karlinn.  Það á nefnilega ekki að byrja að tvöfalda suðurlandsveginn þar sem flest slys hafa orðið síðustu ár.  Ég segi bara: Ölfusmenn klárið það sem til ykkar friðar heyrir.  Ráðuneytismenn: Klárið það sem til ykkar friðar heyrir.  Vegagerð: Klárið það sem til ykkar friðar heyrir.  Byrjið svo strax og hægt er báðu megin frá, það er vaxandi atvinnuleysi, nóg til af tækjum og bara drífa í þessu strax!!

Miklu meira síðar...

Athugasemdir

[Björg Árnadóttir, 17.8.2008 kl. 21:42]

Nú er ég nú barasta slatta sammála þér! Auðvitað er fúlt að vera aumur í puttanum (eða hverju sem er) og komast ekki í partýið en kommon! Maður læknar bara puttann og rústar þessu næst!

Handboltagaurarnir eru komnir í 8 liða úrslitin sem er bara flott. Hins vegar munu þeir endurtaka gamlan leik og tapa þeim eina leik sem ekki má tapa og munu því ekki geta keppt um hærra sæti en það 5. Sem er reyndar líka ágætis sæti. Ekki segja neinum að ég sagði þetta!!! 

Ég er búin að vera að spöglera í einu varðandi þessa vegagerð milli Húrígúri og Selfoss..... Ekki ætla kallarnir að setja svona risa mislæg gatnamót við hvern einast troðning við veginn?? Mér þykir nú alveg nóg um fjöldann hérna hjá okkur við Brautina en vegirnir eru margfalt fleiri þarna suðurfrá. Mér finnst sjálfgefið að það þurfi að fara í einhverja innansveitarvegagerð þarna til að fækka gatnamótum að þjóðvegi 1 til þess að þetta verði ekki eitt endalaust haf af götusnúðum! En það sem mér finnst sjálfgefið er ekki endilega víst að vegagerðinni eða innansveitarmönnum þyki sjálfgefið. Sérstaklega ekki ef það kostar að einhver þarf að láta eftir smá ræmu af þúfum eða að keyra nokkur hundruð metrum lengra til að komast í sjoppu.