Vörubílaslagsmál

Halló heimur!

 Í gær sáum við íslenska óeirðalögreglu fyrir alvöru í fyrsta sinn, man allavega ekki eftir að hafa séð óeirðalögreglu áður gráa fyrir járnum að berja á borgurum þessa lands.  Menn kepptust síðan við að kenna hverjir öðrum um að hafa byrjað ólætin.

Hvað sem því líður get ég ekki séð að neitt afsaki grjót- og eggjakast að lögreglu.  Heldur fólk í alvöru að það sé látið viðgangast?, ég bara spyr.  Þú kastar grjóti í lögreglu, ert tekinn fastur og æpir svo "lögregluríki, lögregluríki", ég er hneykslaður á fólki sem hagar sér svona.  Hitt er svo annað mál að það er ekki víst að alveg hárrétt hafi lögreglan haldið á málum, kannski voru einhverjir alsaklausir teknir fastir, það er vissulega miður.

Eftir því sem mér skilst komu þarna vörubílstjórar í kaffi og lokuðu í leiðinni suðurlandsveginum, að því að mér sýndist, í aðra áttina.  Það virtist hins vegar vera opin hjáleið hinumegin við bensínstöðin svo tafir hefðu ekki átt að ver svo miklar.  Þetta snerist hins vegar upp í einhverskonar óeirðir, einhverjir, að manni sýndist, krakkagemlingar komu þarna til að "snapa fæting" eins og það hét í mínu ungdæmi.  Ein stúlka sagði aðspurð um hvers vegna hún hafi hent eggjum í lögreglu: "Bara!?, til að skapa stemningu eða eitthvað...", ég spyr nú bara "eitthvað hvað?".

Síðan kemur hinn mæti maður, kallaður talsmaður vörubílstjóra, í sjónvarpið og glutraði niður tækifærinu til að fordæma vitleysuna.  Þessi ágæti maður sem mér hefur hingað til fundist nokkuð málefnalegur, sneri skyndilega við blaðinu og gerðist sérlega ómálefnalegur.  Ég bara skil ekki hvernig þetta getur verið málstaðnum til framdráttar.

Friðsamleg mótmæli einhverra hópa tel ég af hinu góða, fólk á að rísa upp og mótmæla.  Það er ekki neinum málstað til framdráttar að efna til óeirða eða slagsmála.  Það er þess vegna sem talsmenn mótmælenda, í þessu tilfelli vörubílstjóra, eiga að fordæma svona vitleysu eins og fór fram í gær.  Krakkarnir sem köstuðu grjóti og eggjum eru tæplega í röðum vörubílstjóra.

Miklu meira síðar...

Athugasemdir

[Fjóla Björnsdóttir, 28.4.2008 kl. 14:58]

Blessadur Gummi:

Langar ad segi thér frá thví í sambandi vid faerluna thína hér ad ofan ad thad komu fréttir af thessum mótmaelum á Latnesku CNN fréttastödinni sem sendir út á spaensku.  Mér fannst thetta dáldid fyndid ad setja thetta fram sem óeirdir sérstaklega m.t.t. thess ad hér eru svona róstur nánast daglegt braud.  En thad kom nú líka fram í fréttinni ad thetta vaeri í fyrsta sinn sem ad svona nokkud gerist í Reykjavík.  Thad er nú kannski ekki alveg rétt thví ad Reykjavík urdu heljarinnar róstur sem voru kaefd med táragasi í mars 1948 daginn sem Thor Thors tilkynnti inngöngu Íslands í NATO. 

Kaer Kvedja.